Azərbaycanlı milli-mədəni fəal Əli Səmədpur Sarab zindanından məzuniyyətə buraxılıb.
Novruz Bayramı ərəfəsində məzuniyyətə çıxan fəal aprelin 1-nə qədər məzuniyyətdə olacaq.

Sarabın inqilab məhkəməsi qondarma ittihamlarla Ə.Səmədpuru 2 il azadlıqdan məhrum edib. Artıq fəal təxminən 20 ay həbs cəzasını çəkib.

Adını çəkdiyimiz fəal 2012-ci ildə Sarabda kütləvi şəkildə tutulan fəalların arasında olub. O Sarab və Təbrizin ETTELAAT (İran Kəşfiyyat Nazirliyi) şöbələrində sorğu-suala tutularkən cismi və ruhi işgəncələrə məruz qalıb. Təxminən 2 ay saxlanılan fəal işgəncələr nəticəsində ürək krizi keçirib və xəstəxanaya intiqal edilmişdir.

Bu arada bir qrup azərbaycanlı milli-mədəni fəal Tikabda (Tikantəpə) mədəni fəaliyyətlərinə görə hazırda məhbus həyatı yaşayan Ramin Rzayinin ailəsinin görüşünə gedib və onun vəziyyəti ilə maraqlanıblar.

Bir qrup fəal isə keçən ay Təbriz zindanından şərti azadlığa buraxılan Rəsul Rəzəvi ilə görüşüb və müxtəlif mövzular ətrafında onunla söhbət ediblər.