Azərbaycan Respublikasının Prezidenti yanında Bilik Fondunun Beynəlxalq layihələr sektorunun müdiri Riyad Məmmədzadə Almaniya Federativ Respublikası Auqsburq Universitetinin nəzdində fəaliyyət göstərən Jakob-Fugger Fondunun icraçı meneceri Dr. Tilman Schröder və universitetin professoru Prof. Dr. Klaus Wolf ilə görüşüb.

Bilik Fondunun İnformasiya Təminatı sektorundan verilən məlumata görə, görüş çərçivəsində Bilik Fondu ilə Almaniyada maarifçilik və analitik araşdırmalarla bağlı layihələr həyata keçirən Jakob-Fugger Fondu arasında ikitərəfli münasibətlərə dair əməkdaşlıq sazişi imzalanıb.

Sazişə görə, Bilik Fondu ilə Jakob-Fugger Fondu arasında birgə layihələrin həyata keçirilməsi, Azərbaycan elmi, tarixi, mədəniyyəti və incəsənətinin Almaniyada təbliği istiqamətində müştərək tədbirlərin gerçəkləşdirilməsi nəzərdə tutulur.

Fugger Fondunun rəhbəri Auqsburq Universitetinin prezidenti Prof. Sabine Doering-Manteuffeldir.

Bilik Fondu “Azərbaycan elmi xaricdə” proqramı çərçivəsində bir sıra xarici universitetlərlə əməkdaşlığını genişləndirir.