Bu gün Etibar Məmmədovun 60 yaşı tamam olur. Yubley münasibətilə Milli Dirçəliş Hərəkatı Partiyasının sədri, millət vəkili Fərəc Quliyev Etibar Məmmədova şəxsi və sədrlik etdiyi partiya adından təbrik ünvanlayıb. Təbrikdə deyilir:
"Hörmətli Etibar bəy! Siz, tarixə Azərbaycan Milli Azadlıq Hərəkatının liderlərindən biri kimi düşsəniz də, əslində Sizin daha cəsarətli addımlarınızın tələbəlik illərindən başladığı bizə məlumdur. Hələ Azərbaycan Dövlət Univerisitetində təhsil aldığınız illərdə, Sovet İmperiyasının amansız rejiminə qarşı Əbülfəz Elçibəyin 1970-ci illərdə yaratdığı Tələbə Hərəkatına qoşulmağınız, bəlkə də mənalı həyat üçün Tanrının Sizə nəsibi idi. Vətənin azadlığı və bütövlüyünə həsr edilmiş və dünyanın ən böyük imperiyası üzərində qələbəyə nail olmuş hər bir hərəkatçının həyatından mənalı həyat ola bilərmi?! Siz nəinki, bu Hərəkatın liderlərindən biri olmağınızla, həm də Hərəkatın qələbəsi olan Azərbaycanın Müstəqillik Aktına imza atmaq və onun qəbuluna səs vermiş bir istiqlalçı deputat kimi də xoşbəxtliyi yaşamış bir insansınız.
Yaradıcılarından biri olduğunuz və ilk sədri seçildiyiniz Azərbaycan Milli İstiqlal Partiyasını dönəmində ölkənin ən güclü partiyasına çevirə bilmək bacarığı ilə Siz, siyasi səriştənin nümunələrindən biri kimi tə yaddaşlarda qaldınız.
Bütün bunlarla yanaşı, Siz həm də Sizi yaxından tanıyanların yaddaşında bir insan və bir ailə başçısı kimi sahib olduğunuz dəyərlərlə də varsınız.
Sizi, bu mənalı 60 ilinizin tamam olması münasibətilə, şəxsim və sədrlik etdiyim Milli Dirçəliş Hərəkatı Partiyası adından təbrik edir, sahib olduğunuz dəyərlərin daha da zənginləşməsini arzulayırıq!
Sayğılarla MDHP sədri,
millət vəkili Fərəc Quliyev
02.04.2015"
Qeyd edək ki, Etibar Məmmədovla Hərəkat yoldaşı olan Fərəc Quliyev Müstəqillik Aktının hazırlanması, qəbulu və bu kimi taleyüklü bir neçə prosesdə birgə olmuşlar.
MDHP Mətbuat Xidməti