Bu gün 1 oktyabr-Beynəlxalq Ahıllar Günüdür. Davam.az-ın xəbərinə görə, Azərbaycanda 70 yaşına çatan vətəndaşlar, habelə ölkədə daimi yaşayan əcnəbi və vətəndaşlığı olmayan şəxslər ahıl hesab olunur. Sentyabrın 30-u tarixinə olan statistikaya əsasən, Azərbaycanda əmək pensiyaçılarının 389 954 nəfəri ahıl vətəndaşlardır. Onlardan 156 684 nəfəri kişi, 233 270 nəfəri isə qadındır. Hazırda ahıl pensiyaçıların 294 778 nəfəri 70-80 yaş arası, 85 237 nəfəri 80-90 yaş arası, 9939 nəfəri 90-dan artıq yaşı olan vətəndaşlardır. Bu il iyulun 1-i tarixindən isə pensiya təyinatında tətbiq olunan yeni qaydalar əsasında 2006-cı ilə qədər qazanılmış bütün pensiya hüquqları yenidən hesablanaraq, təxminən 900 min nəfər əmək pensiyaçısının pensiyası əsaslı şəkildə (orta hesabla 40 faiz) artıb. Bununla da bütün pensiyaçılar yoxsulluq səviyyəsindən yuxarı olan pensiya almağa başlayıblar.