Neft İxrac Edən Ölkələr Təşkilatı (OPEC) quruma üzv ölkələrin neft ixracatı barədə illik hesabat yayaraq İranın neft gəlirlərinin əvvəlki illərlə müqayisədə xeyli dərəcədə azalmasından xəbər verib.
OPEC-in rəsmi saytında yayılan 122 səhifəlik hesabatda bildirilir ki, 2014-cü ildə İranın neft satışından əldə etdiyi gəlir 54 milyard dollardan aşağı düşüb: “Halbuki 2011-ci ildə, yəni keçmiş prezident Mahmud Əhmədinejad hökumətinin axır vaxtlarında bu rəqəm 114 milyard dollar idi. İran ötən il ümumilikdə hər gün 1 milyon 109 min barel neft ixrac edib. Bu isə 53 milyard, 652 milyon dollar təşkil edir. Bu rəqəm 2013-cü ildə 62 milyard dollara yaxın olsa da, 2011-ci ildə Qərbin İrana qarşı sanksiyalar genişlənməzdən əvvəl təxminən 114 milyard dollar idi.

İranın valyuta gəlirlərinin böyük bir hissəsi hələ də neftdən asılıdır. İranın 2014-cü ildə illik ümumi ixracatının dəyəri 99 milyard dollara yaxın olub. Bu isə əvvəlki ilə nisbətən o qədər də dəyişməyib. Həmçinin İranın 2014-cü ildə idxalatının həcmi 55 milyard dollara bərabər olub. Bu isə əvvəlki illə müqayisədə 9 milyard, 2011-ci ilə nisbətən 23 milyard dollar azaldığını göstərir”.

Qeyd edək ki, Avropa Birliyi və Amerika 2012-ci ilin ortalarından başlayaraq İrana qarşı sanksiyaları gücləndirəndən bu yana İranın neft ixracatının həcmi getdikcə azalmağa başlayıb. Nəticədə onun neft gəlirlərinin həcmi minimuma endirilib.