Nazirlər Kabinetinin Yol Hərəkətinin Təhlükəsizliyi Komissiyasında Bakıda avtobusların dayanacaqlarda lüzum olmadan həddindən artıq dayanmaları ilə bağlı məsələ qaldırılıb.

Bu barədə Daxili İşlər Nazirliyi Respublika Baş Dövlət Yol Polisi İdarəsinin İctimaiyyətlə əlaqələr şöbəsinin rəisi, polis polkovniki Kamran Əliyev deyib.

Şöbə rəisi qeyd edib ki, sürücülərin avtobusları dayanacaqlarda müəyyən edilmiş vaxtdan çox saxlamaları yolverilməzdir. Bu, yollarda nəqliyyat vasitələrinin hərəkətinə və təhlükəsizliyin təmin edilməsinə maneçilik yaradır: “Hər bir avtobus üçün dayanacaqlarda dayanma müddəti müəyyən edilib. Sürücü həmin müddət ərzində avtobusu sərnişinləri mindirib-düşürmək üçün saxlamalıdır. Sürücülər netro stansiyalarının çıxışlarında uzun müddət avtobusu saxlayıb sərnişinlərin gəlişini gözləməməlidirlər. Çünki bu, bəzən çox vaxt aparır. Bu, digər avtobusların da həmin ərazidə yığışmasına və yolun keçilməz hala gəlib çıxmasına gətirib çıxarır. İnsanlar dayanacaqda avtobusların gəlməsini gözləməlidirlər. Avtobuslar dayanıb insanların gəlməsini gözləməli deyil”.

Onun sözlərinə görə, Komissiyanın iclasında tapşırıqlar verilib ki, avtobusların metro stansiyalarının yaxınlığındakı ərazilərdə uzunmüddətli dayanma hallarına son qoyulsun: “Avtobuslara dayanacaqlarda yalnız sərnişinlərin minib-düşməsi üçün tələb olunan zaman ərzində dayanmasına icazə verilir. Bu, digər avtobusların da həmin dayanacağa yaxınlaşaraq sərnişinlərin minib-düşməsinə, eləcə də yoldan keçən digər nəqliyyat vasitələrinin hərəkətinə maneçilik yaratmasın”.

K.Əliyev əlavə edib ki, bu məsələ ilə bağlı problemin aradan qaldırılmasına Dövlət Yol Polisinin və Nəqliyyat Nazirliyinin müvafiq qurumlarının əməkdaşları cəlb olunub: “Məsələ ilə əlaqədar avtobus marşrutlarının sahiblərinə də tapşırıqlar verilib. Problemin qarşısını bütün yol boyu polis naryadlarını qoymaqla almaq mümkün deyil. Bu işə bütün aidiyyatlı qurumlar cəlb olunmalıdır. Yollarda nəqliyyat sıxlığının yaranmaması üçün təkcə dövlət qurumları yox, sahibkarlar da, sürücülər də mümkün olan bütün tədbirləri görməli, lazımi köməkliyi əsirgəməməlidirlər. Bu sahədə müsbət nailiyyətlər əldə etmək üçün bu işə hamı öz töhfəsini verməlidir”.