İki gün əvvəl həcc mərasimi zamanı Məkkədə baş verən hadisədə dünyasını dəyişən 4 ərdəbilli zəvvarım adları bəlli olub.
İranın Həcc və Ziyarət Təşkilatının yaydığı məlumata görə, Mina dağında Şeytana daş atarkən baş verən olayda həyatını itirən ərdəbilli zəvvarlar Malik Dehqan Xiyavi, Fərahəm Nuri Nuran, Bayraməli Bəxtə və Bilal İslamiyandır.

Hadisədə dünyasını dəyişən və ya xəsarət alan, eləcə də itkin düşən Cənubi Azərbaycandan olan digər zəvvarların taleyi hələlik bilinmir.

Qeyd edək ki, sentyabrın 24-ü sübh saat 9:30 radələrində Səudiyyə Ərəbistanında həcc mərasimi zamanı, Mina dağı ətəyində yaranan sıxlıq nəticəsində baş vermiş hadisədə ən azı 1300 zəvvar həlak olub, 2 min nəfərə yaxın insan xəsarət alıb. Hadisə, zəvvarlar Mina dağının ətəyində Şeytana daş atarkən baş verib və yaranan sıxlıq nəticəsində yüzlərlə zəvvar əl-ayaq altında qalıb.

Hadisədə ən azı 133 iranlı zəvvar həlak olub, 83-ü xəsarət alıb, 336 nəfəri də itkin düşüb.