İranda Azərbaycan milli kimliyi uğrunda dinc mübariz Cəfər Rüstəmirad Astara Cəza Məhkəməsi tərəfindən 6 aylıq həbsə məhkum edilib.
Cəfər Rüstəmiradi Azərbaycanın “Heyran” gədiyinin Gilan əyalətinə birləşdirilməsinə etiraz etdiyinə və bu barədə dikəldilmiş tablonun yazısına müdaxilə etdiyinə görə dövlət əmlakına ziyan vurmaqda günahlandıraraq ona 6 ay həbs cəzası kəsib.

Cəfər Rüstəmirad Azərbaycanın yamyaşıl və mənzərəli guşələrindən biri sayılan “Heyran” gədiyinin Gilan əyalətinə birləşdirilməsinə qarşı çıxdığına görə iyulun 14-də (tirin 23-də) ETTELAAT-ın yerli şöbəsinin əməkdaşları tərəfindən tutulub. Fəal bir neçə gün ETTELAAT idarəsində saxlandıqdan sonra 10 milyon tümənlik mülk girovu qarşılığında müvəqqəti azadlığa buraxılıb.

Qeyd edək ki, Ərdəbilin “Pəyam-i nur” Universitetinin sənaye mühəndisliyi ixtisası üzrə tələbəsi olan Cəfər Rüstəmirad milli zəmində apardığı dinc fəaliyyətinə görə bundan əvvəl də bir neçə dəfə tutulub. Fəalın həbsdə saxlandığı müddətdə müxtəlif psixi (ruhi) və fiziki təzyiq və işgəncələrə məruz qoyulduğu bildirilir.