Azərbaycanlı milli-mədəni fəal və jurnalist ETTELAAT-ın (İran Kəşfiyyat Nazirliyi) Ərdəbil şöbəsi tərəfindən ağır ruhi işgəncələr altında sorğu-suala tutulub.
GAMAC saytının yaydığı məlumatda bildirilir ki, Rəhim Qulami oktyabrın 5-də (mehrin 13-də) ETTELAAT şöbəsində sorğu-suala tutularkən qeyri-insani rəftarlarla üzləşib.

Dindirmə zamanı azərbaycanlı fəala bu suallar irəli sürülüb:

- Nə üçün ölkə xaini Səid Mətinpurun (tanınmış azərbaycanlı milli-mədəni fəallardan biridir, o keçən həftələrdə 7 il həbsdən sonra azadlığa buraxılıb) görüşünə gedib və özünüzlə birlikdə bir neçə nəfəri də görüşə getməyə təşviq edibsiniz?

- Ərdəbildə divarlar üzərində yazılan şüarlar və stadionda qaldırılan plakatlar sizin fəaliyyətinizə aiddir, biz telefonunuzu kontrol edərək bu məlumatı əldə etmişik.

- Siz bilməlisiniz ki, biz sizin kimiləri öldürməyə hər zaman qadirik və əgər fəaliyyətiniz davam edərsə, həyat yoldaşınızı işindən çıxarıb və sizi aradan aparacayıq.

- Sizin Ayət Xeyrcunun toy mərasiminə qatılmağınız və Abbas Lisaninin doğum gününü qeyd etməyiniz qəbuledilməzdir.

- Özünüzün bu qədər problemi olduğu halda, nə üçün türk dilində yazılmış kitabların yayılması və siyasi məhbusların ailəsi üçün maddi yardım toplayırsınız?

Bildirək ki, R.Qulami Azərbaycanın milli-mədəni hüquqlarının tələbi uğrunda apardığı dinc fəaliyyətə görə dəfələrlə saxlanılıb və təknəfərlik məhbəslərə salınıb. O jurnalistika və ekoloji sahələrində də geniş fəaliyyət göstərib.