İranda azərbaycanlıların dövlət televiziyasında təhqir olunmasına qarşı etirazlar Təbriz Universitetində davam edir.
Noyabrın 10-da Təbriz Universitetinin yüzlərlə azərbaycanlı tələbəsi ali təhsil ocağının həyətində toplaşaraq ölkəyə hakim fars irqçılığına qarşı etiraz bildiriblər. “Haray-haray mən türkəm” və “Yaşasın Azərbaycan” şüarları səsləndirən tələbələr üzərində rassizm əleyhinə şüarlar yazılmış plakatlar qaldıraraq ölkədə Azərbaycan türklərinin vaxtaşırı dövlət televiziyasında təhqir olunmasını məhkum ediblər. İnsidentsiz keçən aksiyaya hər hansı bir müdaxilə edilib-edilmədiyi barədə məlumat yayılmayıb.

Qeyd edək ki, noyabrın 6-da İran Dövlət Televiziyasının 2-ci kanalından yayımlanan “Fitilə” adlı proqramda Azərbaycan türkləri iyrənc bir şəkildə açıq-aşkar təhqir edilib, alçaldılıb. Noyabrın 9-da isə İranın azərbaycanlılar yaşayan əyalətlərində yüz minlərlə əhali küçələrə axışaraq fars irqçılığına qarşı etiraz aksiyası və yürüşlər keçiriblər. Təbriz və Urmiyada polislə qarşıdurmada yüzlərlə azərbaycanlı tutulub, bir neçə nəfər bədən xəsarəti alıb.