İranda Azərbaycan milli kimliyi uğrunda dinc mübariz, milli-mədəni fəal Əli Feyzipur tutulub.
İran Kəşfiyyat Nazirliyinin (ETTELAAT) Xiyav (Meşkinşəhr) şöbəsinin əməkdaşları azərbaycanlı dinc fəal Əli Feyzipuru noyabrın 11-də tutub naməlum istiqamətə aparıblar. Azərbaycanlı fəalın hazırda harada saxlandığı və konkret nədə günahlandırıldığı bilinmir.

Yayılan məlumatlara görə, son günlər Güney Azərbaycanda fars irqçılığına qarşı etirazlar vüsət xarakter alandan sonra Ərdəbildə və Azərbaycanın digər şəhərlərində yüzlərlə dinc fəal tutulub və ya təzyiq və təhdgidə məruz qoyulub.

Qeyd edək ki, noyabrın 6-da İran Dövlət Televiziyasının 2-ci kanalından yayımlanan “Fitilə” adlı proqramda Azərbaycan türkləri iyrənc bir şəkildə açıq-aşkar təhqir edilərək alçaldılıb.

Noyabrın 9-da isə İranın azərbaycanlılar yaşayan bütün əyalətlərində yüz minlərlə insan küçələrə axışaraq ölkəyə hakim fars irqçılığına qarşı etiraz aksiyası və yürüşlər keçiriblər. Təbriz və Urmiyada polislə qarşıdurmada yüzlərlə azərbaycanlı fəal tutulub, bir neçə adam bədən xəsarəti alıb, ən azı bir nəfər də polis tərəfindən öldürülüb.