İranın Qəzvin şəhərində azərbaycanlı dinc fəal Həsən Heşməti Əfşar tutulub. Fəal 8 gün əvvəl həbs edilsə, bu barədə məlumat yenicə yayılıb.
İran Kəşfiyyat Nazirliyinin (ETTELAT) Qəzvin şöbəsinin əməkdaşları Azərbaycanın Tikantəpə şəhərindən olan Həsən Heşməti Əfşarı noyabrın 11-də tutub naməlum istiqamətə aparıblar. Fəalın hazırda harada saxlandığı və konkret nədə günahlandırıldığı bilinməsə də, onun həbsi, son günlərdə Güney Azərbaycanın müxtəlif şəhərlərində fars irqçiliyinə qarşı kütləvi etiraz aksiyalarının keçirilməsi ilə əlaqələndirilir.

Xatırladaq ki, noyabrın 6-da , İranın dini lideri ayətullah Əli Xamneyinin birbaşa nəzarətində olan Dövlət Televiziyasından yayımlanan “Fitilə” adlı proqramda Azərbaycan türkləri iyrənc bir şəkildə təhqir edilərək alçaldılıb.

Noyabrın 9-da İranın azərbaycanlılar yaşayan bütün əyalətlərində yüz minlərlə insan küçələrə axışaraq fars irqçiliyinə qarşı etiraz yürüşləri keçiriblər. Nəticədə Təbriz və Urmiyada ən azı 130 azərbaycanlı fəal tutulub, bir neçə adam bədən xəsarəti alıb, bir nəfər isə polis tərəfindən öldürülüb.