Xocalı soyqırımının 20 illiyi ərəfəsində yeni www.garabagh.net saytı işıq üzü görüb.

Bu barədə adıçəkilən saytın redaksiyasından məlumat veriblər. Məlumatda bildirilir ki, İlham Abduyevin ideya rəhbərliyi və təşkilatçılığı ilə www.azerbaijans.com saytının kollektivi tərəfindən hazırlanan sayt həmçinin “Evrovizion” yarışması ərəfəsində Qarabağ həqiqətlərini dünyaya çatdırmaq üçün ən gözəl vasitədir.

“Qarabagh.net mükəmməlliyi, yığcamlığı, virtual görünüşü ilə digər saytlardan fərqlənir. Saytın dünyanın aparıcı yeddi dilində, Azərbaycan dilindən başqa ingilis, alman, rus, türk, fransız, ispan dillərində təqdimatı onun beynəlxalq səviyyədə geniş istifadə imkanlarını təmin edir. Sayt 40 bölmə və 200 linkdən ibarətdir. Hər bir bölmə Qarabağ haqqında ayrı-ayrı informasiyalar bazasına malikdir. Bölmələrdə Qarabağ tarixi, tarixi müqavilələr, Qarabağın inzibati bölgüsü, coğrafiyası, sosial inkişafı, mədəniyyəti, mətbəxi, Qarabağ münaqişəsi, onun fəsadları, Xocalı soyqırımı, münaqişə ilə bağlı dövlət qayğısı və dövlət siyasəti, prezidentin Qarabağ münaqişəsi ilə bağlı çıxışları, münaqişənin beynəlxalq təşkilatlarda çözümü və s. barədə mükəmməl bilgi verilib. Bir sözlə, Qarabağ həqiqətlərini bütövlükdə özündə əks etdirən saytı Qarabağ haqqında ensiklopediya hesab etmək olar və bu, sözsüz, bölgə haqqında internet məkanında informasiya bolluğu yaradacaqdır. Bundan əlavə, sayt xaricdə yaşayan azərbaycanlılar üçün Azərbaycan lobbisi üçün məlumat mənbəyi kimi çox yararlı olacaqdır” - deyə məlumatda bildirilir. Məlumatda saytın vizual texniki tərtibatı da mükəmməl olduğu qeyd olunmaqla yanaşı saytın loqosunun fonunda Qarabağ bölgəsinin yenicə əldə edilmiş şəkilləri öz əksini tapdığı da bildirilir. Bundan başqa, saytda yerləşdirilən informasiyaları vizuallaşdıran video və foto bölmələri fəaliyyət göstərir.