"Bakı Metropoliteni" Qapalı Səhmdar Cəmiyyəti dünyaşöhrətli azərbaycanlı cazmen, pianoçu Vaqif Mustafazadənin doğum günü ilə əlaqədar növbəti ilkə imza atıb.

"Bakı Metropoliteni" QSC-nin mətbuat xidmətinin rəhbəri Nəsimi Paşayev bildirib ki, bununla bağlı təmsil etdiyi qurum 106.3 FM radiosu ilə birgə layihə hazırlayıb.

Bu gün məhşur cazmenin doğum günü ilə əlaqədar Bakı Metropoliteninin bütün stansiyalarında 106.3 FM-də hazırlanmış, cazmenin xatirəsinə həsr olunmuş xüsusi efir yayımlanacaq. Bir neçə saatlıq efir metrostansiyalarda günorta saat 15:00-da başlayacaq və axşam saatlarınadək davam edəcək.

Xatırladaq ki, bəstəkar, pianoçu, caz-muğam üslubunun ustadı, Azərbaycanın əməkdar incəsənət xadimi Vaqif Əziz oğlu Mustafazadə 16 mart 1940-cı ildə Bakıda İçəri Şəhərdə dünyaya göz açıb.