Bakı Slavyan Universitetində (BSU) “Ulu Öndər Heydər Əliyev irsində multikultural və tolerant dəyərlər” mövzusunda Beynəlxalq Elmi Konfrans çərçivəsində mayın 4-də BSU-nun Türkiyə Araşdırmaları Mərkəzində Qazaxıstanın Lev Qumilyov adına Avrasiya Milli Universitetinin (AMU) nümayəndələri ilə görüş keçirilib.

BSU-dan bildiriblər ki, təbirdə bu ali məktəbin prorektoru, Türkiyə Araşdırmaları Mərkəzinin müdiri, dosent Aygül Hacıyeva BSU haqqında məlumat verib. Türkiyə Araşdırmaları Mərkəzinin fəaliyyətindən danışan A.Hacıyeva türkiyəşünaslığın BSU-da inkişafından və həmin ixtisas üzrə təhsil alan tələbələrin bu sahəyə marağından, Türkiyənin qabaqcıl ali təhsil müəssisələri ilə BSU arasında qurulan sıx əməkdaşlıqdan söz açıb.

AMU-nun əməkdaşları Azərbaycanda tolerantlıq ənənələri və multikultural dəyərlərin qorunub saxlanıldığını vurğulayıb, BSU-da keçirilən Beynəlxalq Elmi Konfransın təşkilini yüksək dəyərləndiriblər.

Görüş çərçivəsində iki ali təhsil müəssisəsi arasında əməkdaşlığın perspektivləri müzakirə olunub.

Tələbə-müəllim mübadiləsi, birgə elmi konfransların təşkili və digər məsələlər barədə razılığa gəlinib, gələcəkdə aparılacaq elmi araşdırmalardan danışılıb.