Rusiyada martın 4-də keçiriləcək prezident seçkilərindən dərhal sonra Kreml ətrafında yerləşən meydanda kütləvi aksiya keçirmək istəyən iqtidar və müxalifət tərəfdarları arasında mübahisə yaranıb.
Putin tərəfdarları və müxalifət mənsubları Moskva meriyasına martın 4 və 5-də Kreml ətrafında kütləvi aksiya keçirmək üçün müraciət ediblər. Meriya, ilk müraciət Putin tərəfdarlarından gəldiyinə görə Lubyanskaya meydanında aksiya keçirmək icazəsini onlara verib. Müxalifət tərəfdarları isə meriyanın tərəf saxladığını və onlara ilk müraciətin müxalifət tərəfdən edilməsinə baxmayaraq Putin tərəfdarlarına güzəştə gedildiyini iddia ediblər.
Meriyadan müxalifət tərəfdarlarına şəhər mərkəzindən kənarda aksiya keçirmək üçün icazə verə biləcəkləri söylənib.
Rusiyada müxalifət tərəfdarları seçki saxtalaşdırılacağı təqdirdə Kreml ətrafındakı meydanlarda düşərgə salacaqlarını planlaşdırıblar. Onların 2004-cü ildə Ukraynada gerçəkləşən “narıncı inqilab”ın ssenarisini təkrarlamaq istədikləri bildirilir.