Ermənistan bu ilin may ayında Azərbaycanda keçiriləcək “Avroviziya 2012” mahnı yarışmasında iştirakdan rəsmən imtina edib. martın 7-də Ermənistanın İctimai Televiziyası bununla bağlı Avropa Yayımları Birliyinə rəsmi xəbərdarlıq məktubu göndərib.

Yanvarın 17-də Ermənistan “Avroviziya 2012” yarışmasında iştirak etmək üçün müraciət təqdim etmişdi. Ancaq erməni nümayəndə heyətinin rəhbəri Qoar Qasparyan o vaxt bildirmişdi ki, Ermənistan Azərbaycanda keçiriləcək yarışmaya qatılıb-qatılmayacağı haqda yekun qərar qəbul etməyib. O bunu belə əsaslandırmışdı ki, Ermənistan təhlükəsizliyin təmin olunması üçün hələ Azərbaycandan zəmanət almayıb.

Fevralın 24-də Ermənistanın 20-dən çox müğənnisi “Avroviziya 2012” yarışında iştirakdan imtinaya çağıran bəyanat qəbul etmişdi.

Azərbaycanın ev sahibliyi edəcəyi “Avroviziya 2012” mahnı müsabiqəsi mayın 22-dən 26-dək Bakıda, Dövlət Bayrağı Meydanı ərazisində tikilən “Bakı Kristal Zalı”nda keçiriləcək.