Azərbacyanda ötən gecədən başlayaraq və hazırda da müşahidə edilən soyuq şaxtalı hava şəraiti ilə əlaqədar bu gün səhər saatlarından Bakının bəzi küçə və prospektlərində yolun hərəkət hissəsi buz bağlayıb. Bakı Nəqliyyat Agentliyindən (BNA) daxil olan xəbərə görə, hazırda Böyükşor qovşağından 20 Yanvar dairəsi istiqamətində, xüsusən də, Ziya Bünyadov prospektində yerləşən körpülər və tunellərdə nəqliyyat vasitələrinin hərəkətində sıxlıq var.
Yolların buz bağlaması nəticəsində analoji vəziyyət A.M.Şərifzadə küçəsində də müşahidə edilir. Bununla yanaşı, 20 Yanvar dairəsindən Tibilisi prospekti istiqamətində, Yusif Səfərov küçəsində (şəhər mərkəzi istiqamətində) və Babək prospektində (mərkəz istiqamətində) də avtomobillərin hərəkətində sıxlıq yaranıb.
Hazırda BNA müvafiq dövlət qurumları ilə əlaqəli şəkildə yollarda avtonəqliyyat vasitələrinin intensiv və təhlükəsiz hərəkətinin təmin edilməsi üçün təxirə salınmaz tədbirlər görür.