Futbol üzrə Azərbaycan kubokunun dörddəbir final mərhələsinin cavab görüşlərinin vaxtı müəyyənləşib.

Peşəkar Futbol Liqasının rəsmi saytı xəbər verir ki, cavab oyunları dekabrın 21-də keçiriləcək.

Günün ilk qarşılaşması Gəncə şəhər stadionunda “Kəpəz”–“İnter” dueli olacaq. İlk oyun “bankirlər”in 2:0 hesablı qələbəsi ilə yekunlaşıb.

Daha sonra “Sumqayıt” klubu “Qarabağ”ı qəbul edəcək. İlk matçda 6:0 hesablı qələbə qazanan Ağdam komandası cütün taleyini artıq həll edib.

Digər görüşdə AZAL və “Qəbələ” komandaları meydana çıxacaqlar. Komandalar arasında baş tutan ilk oyunda “Qəbələ” 2:1 hesabı ilə əzmkar qələbə qazanıb.

Günün son oyununda “Neftçi” və “Zirə” klubları üz-üzə gələcəklər. Paytaxt duelində ilk qarşılaşmanı flaqman 3:0 hesabı ilə öz xeyrinə başa vurub.