ABŞ-ın seçilmiş prezidenti Donald Tramp yanvarın 11-də seçkilərdə qələbəsindən sonra Nyu-Yorkda ilk böyük mətbuat konfransını keçirəcək. Bu barədə Tramp tərəfindən Ağ evin mətbuat katibi postuna irəli sürülmüş Şon Spayser ənənəvi brifinqdə məlumat verib.

TASS informasiya agentliyi xəbər verir ki, Spayserin sözlərinə görə, Donald Tramp qarşıdakı mətbuat konfransında təkcə prezidentlik səlahiyyətləri müddətində öz biznesinin idarə edilməsindən necə kənarlaşacağına deyil, mövzuların geniş dairəsinə toxunmaq niyyətindədir. O, hədəfləri və prioritetləri barədə sualları cavablandırmağa hazırdır.

Xatırladaq ki, Donald Tramp ailə kompaniyası olan Trump Organization şirkətinin prezidenti və icraçı direktorudur. Kampaniyanın üç vitse-prezidenti postunu onun qızı İvanka, oğlanları Erik və Donald tutur. Tramp bir qədər əvvəl bəyan etmişdi ki, dövlət başçısı vəzifəsinə başlamazdan əvvəl biznesdən gedəcək və kompaniyasına rəhbərliyi uşaqlarına həvalə edəcək.