Fevralın 23-də görkəmli şair, yazıçı, dramaturq, pedaqoq Abdulla Şaiqin anadan olmasının 136-cı ildönümü ilə əlaqədar Fəxri xiyabanda ədibin məzarı ziyarət edilib.

Ama tədbirinə bir sıra xatirə muzeylərinin əməkdaşları, ədəbiyyat, incəsənət xadimləri, ədibin adını daşıyan 54 nömrəli orta məktəbin müəllim və şagirdləri və universitet tələbələri qatılıblar.

Mərasimdə Abdulla Şaiqin Mənzil Muzeyinin direktoru Ülkər Talıbzadə, muzeyin böyük elmi işçisi Arzu Hacıyeva çıxış edərək ədibin həyat və yaradıcılığından danışıblar.

Bildirilib ki, ömrünün 34 ilini Azərbaycan təhsilinin inkişafına həsr edən Abdulla Şaiq maarif və məktəb işləri ilə məşğul olub, qadınlar üçün jurnal çıxarmaq, uşaqlar üçün bağça açmaq, kitabxana yaratmaq, kasıb uşaqları pulsuz oxutmaq yollarını arayıb tapıb. Eyni zamanda o, “Əlifba” kitabı hazırlayıb, müxtəlif dərsliklər və dərs proqramları ərsəyə gətirib.

Mərasimində A.Şaiqin əsərlərindən ibarət kompozisiya təqdim edilib.