Elektron qaimə-fakturanın tətbiqi vergi daxilolmalarının artmasına da təsir göstərəcək. Qanunvericiliklə bağlı vergi orqanları və biznes arasında qarşılıqlı əlaqənin genişləndirilməsi davam etdiriləcək.

Vergilər Nazirliyinin Media və Kommunikasiya Mərkəzindən bildirilib ki, bu barədə Vergi siyasəti və strateji araşdırmalar departamentinin baş direktorunun müavini Şamil Ərəbov açıqlama verib.

O, qeyd edib ki, sahibkarlara hərtərəfli diqqət və qayğının göstərilməsi, əlverişli biznes və vergi mühitinin təmin edilməsi, vergiödəyicilərinin fəaliyyətinin genişlənməsi ölkəmizdə aparılan iqtisadi siyasətin əsas hədəflərindəndir. Vergi Məcəlləsinə edilmiş dəyişikliklərin böyük bir qismi də məhz sahibkarların geniş fəaliyyəti üçün daha əlverişli şərait yaradılmasına xidmət edir. Dəyişikliklərin əsas məqsədi ölkədə sahibkarlığın və investisiyaların təşviqi, xüsusilə kiçik və orta biznesin inkişafına daha əlverişli şəraitin yaradılması, vergi yükünün azaldılması, sahibkarların hüquqlarının daha etibarlı qorunması, vergi orqanları və sahibkarlıq subyektləri arasında qarşılıqlı etimadın səviyyəsinin yüksəldilməsidir. Bu məqsədlə bir sıra vergi güzəştləri tətbiq olunub, stimullaşdırıcı və vergi yükünü optimallaşdıran mühüm addımlar atılıb.

Elektron qaimə-fakturanın tətbiqi ilə bağlı vergiödəyicilərinin hazırlıq səviyyəsini şərh edən Ş.Ərəbov sahibkarlarla keçirilən görüşlərdə bununla bağlı onlara ətraflı məlumatlar verildiyini, e-qaimənin tətbiqinə hazırlaşmalarının tövsiyə olunduğunu bildirib: “Artıq aprelin 1-nə az müddət qalıb, ƏDV ödəyiciləri və vergi tutulan əməliyyatlarının həcmi 200.000 manatdan artıq olan ticarət və ictimai iaşə fəaliyyəti ilə məşğul olan şəxslər üçün bu qaydalar cari il aprelin 1-dən tətbiq olunduğundan, onların bu yeniliyə hazırlığı ilə bağlı təşviqat işləri daha da gücləndirilib. Elektron qaimə-fakturanın tətbiqi vergiödəyiciləri üçün müsbət əhəmiyyət daşıyır. Əsas üstünlüyü isə kargüzarlıq xərclərinin və vaxt itkisinin azaldılmasıdır. Bu baxımdan, yeniliyə sahibkarların məsuliyyətlə yanaşmaları tövsiyə olunur”.

Qeyd olunub ki, dəyişikliklərdən sonra sahibkarlar tərəfindən müxtəlif suallar qaldırılır və ortaya çıxan aktual məsələlərin təhlili aparılır. Məsələn, regionlarda çalışan sahibkarların böyük əksəriyyəti sadələşdirilmiş vergiödəyiciləridir. Bu ildən sadələşdirilmiş vergi bəyannamələrinin yeni formaları müəyyən edilib. Bəyannamə formaları ilə bağlı çətinlik yaranmaması üçün sahibkarlara xeyli izahedici məlumatlar verilib, praktiki baxımdan lazımi kömək göstərilib.

Ş.Ərəbovun sözlərinə görə, sahibkarlıq mühitinin daha da yaxşılaşdırılması, qanunvericiliyin təkmilləşdirilməsi ilə bağlı vergiödəyicilərinin rəy və təklifləri həmişə öyrəniləcək. Sıx və açıq dialoq, geniş müzakirələr şəraitində əldə edilən ortaq yanaşmalar qanunvericiliyin təkmilləşdirilməsinə öz mühüm təsirini göstərir, azad biznesə dəstəyin daha da yaxşılaşmasına əlverişli imkan yaradır.

Vergi qanunvericiliyinə dəyişikliklərin edilməsi ölkədə aparılan iqtisadi siyasətə uyğundur və bunun gələcəkdə də davam etdirilməsi mümkündür. Bu baxımdan, sahibkarlarla görüşlər mütəmadi xarakter daşıyacaq, onlarla müzakirələr davam etdiriləcək, fikir və təklifləri nəzərə alınacaq.

Vergilər Nazirliyi tərəfindən yanvar ayı ərzində regionlarda keçirilən silsilə görüşlərdə geniş maarifləndirmə və təşviqat işləri aparılıb, qanunvericiliyə olunmuş dəyişikliklərin izahı ictimaiyyətə çatdırılıb. Azərbaycanın bütün regionlarını əhatə edən 3500-dən artıq sahibkarın qatıldığı bu tədbirlər yüksək fəallıq şəraitində keçib.