Azərbaycan Milli Məclisinin Regional məsələlər komitəsinin sədri Arif Rəhimzadə KM.ru rus xəbər portalına qalmaqallı müsahibə verib. Bildirib ki, azərbaycanlılara “türk” deyilməsi düzgün deyil, çünki azərbaycanlılar türk sayılmır.

“Bizim bədbəxtçiliyimiz ondadır ki, Rusiya bizi türk hesab edib, amma azərbaycanlılar türk deyillər. Bu, səhvdir. Bəli, biz azərbaycanlıyıq, türklərlə eyni kökə malikik, amma başqa-başqa xalqlarıq. Çar Rusiyası ermənilərin bizim regiona köçürülməsini “Türkiyə təsirini” aradan qaldırmaq üçün həyata keçirib. Beləcə, çar hakimiyyəti ermənilərə dəstək olub”.

Deputatın bu fikirləri cəmiyyətdə kəskin etirazla qarşılanıb.

Milli Məclisin deputatı Fərəc Quliyev bildirdi ki, sözügedən fikri gündəmə gətirənlər bununla ermənilərdən də pis davranırlar:

“Kim türk deyilsə, birdəfəlik bunu etiraf etsin və öz adından danışsın, xalqın adından yox. Mən türkəm və bununla da fəxr edirəm. Adam tat, ləzgi, talış, kürd ola bilər. Azərbaycanda bütün xalqlar bərabər əsasda yaşayırlar. Azərbaycan xalqı tolerantdır, bütün din və xalqlara hörmətlə yanaşırıq. Heç kimin ixtiyarı yoxdur ki, xalqın adından danışsın. Xalqımızın başqa millətə aid olduğunu deyib, adını dəyişmək istəyən həmin personajlar başa düşsünlər ki, bununla ermənilərdən də pis davranırlar. Düşmən ermənilər belə bizi öz adımızla, türk olaraq çağırırlar. Bu məsələnin müzakirə olunma zamanı çatıb. Konstitusiyada Azərbaycan dili sözünün Azərbaycan türkcəsi sözü ilə əvəz olunması zamanı çatıb. Çünki ölkəmizdə başlıca etnos Azərbaycan türkləridir. Azərbaycan isə yer adıdır. Azərbaycan türklərinin adından başqa etnoslara mənsub insanlar (hərçənd bütün etnoslara hörmət edirəm), “biz türk deyilik deməsinlər, desinlər mən türk deyiləm”.

Son olaraq, qeyd edək ki, Arif Rəhimzadə sözügedən məsələ ilə bağlı Moderator.az saytına açıqlamasında fikirlərinin təhrif olunduğunu söyləyib:

“Biz türk deyilik” ifadəsinin yayılması boş söhbətlərdir. Tədbirin sonunda bir nəfər mənə yaxınlaşıb sual verdi. Mən də dedim ki, “biz etnik cəhətdən türkük, amma millət kimi azərbaycanlıyıq”.