Türkdilli Dövlətlərlə Dostluq və Mədəni Əlaqələr Cəmiyyəti, Qeyri-hökumət Təşkilatlarına Dövlət Dəstəyi Şurasının maliyyə yardımı ilə Avrasiya Strateji Araşdırmalar Mərkəzi və İstanbul Aydın universiteti ilə birgə Türkiyənin İstanbul şəhərində aprelin 24-də “Azərbaycanlıların soyqırımı və Qarabağ həqiqətləri” adlı elmi simpozium keçirilib. Məlumata görə, tədbirdə azərbaycanlıların soyqırımı haqqında qısametrajlı film nümayiş olunub.

Konfransda çıxış edən millət vəkili Musa Qasımlı ermənilərin soyqırımı iddiaları və Azərbaycan türklərinin məruz qaldığı soyqırımları haqqında danışıb. Digər çıxış edən natiqlər Dağlıq Qarabağa aid tarixi faktlardan söhbət açıblar.

Sonda tədbir iştirakçılarına Gəncliyə Yardım Fondunun maliyyə dəstəyi ilə türk dilinə tərcümə edilən Qarabağ suallar və faktlar kitabı və QHT-lərə Dövlət Dəstəyi Şurasının maliyyə yardımı ilə hazırlanan ermənilərin törətdikləri soyqırımları haqqında bukletlər paylanılıb.