Azərbaycan prokurorluq orqanlarına 100 ştat vahidi üzrə müsabiqə elan olunub.
Baş Prokurorluğun mətbuat xidmətindən verilən məlumata görə, prokurorluq orqanlarında işləmək istəyənlər sənədlərini iyunun 5-dən avqustun 31-dək təqdim edə bilərlər.
Sənəd qəbulu Baş Prokurorluğun inzibati binasının Qəbul otağında hər gün (şənbə, bazar və bayram günləri istisna olmaqla) saat 10:00-dan saat 17:30-dək qəbul olunacaq.
Prokurorluğa işə qəbul olunmaq istəyən hər bir namizədin hazırlığının, bilik səviyyəsinin, ümumi dünyagörüşünün, prokuror və ya müstəntiq vəzifəsinə yararlığı və layiqliyinin müəyyən edilməsi məqsədilə tam aşkarlıq şəraitində, şəffaf üsullarla və beynəlxalq tələblərə uyğun keçirilən ixtisas imtahanları (test və yazılı imtahanlar) və müsahibədən ibarət müsabiqə təşkil ediləcək. Müsabiqədə bərabər nəticələr əldə etmiş şəxslərdən xarici dilləri bilənlərə üstünlük veriləcək.
Prokurorluğa işə qəbul olunmaq üçün sənədlərini təqdim etmək istəyən namizədlərin ali hüquq təhsili Azərbaycan ərazisində müvafiq qaydada tanınan diplomla təsdiq edilməli, onlar Azərbaycan Respublikasının dövlət dilini sərbəst bilməli və seçkilərdə iştirak etmək hüququna malik olmalıdır. Prokurorluğa işə 30 yaşınadək olan Azərbaycan vətəndaşları qəbul olunurlar.