Azərbaycanın Milli Qəhrəmanı Mübariz İbrahimovun adı Tovuzda əbədiləşdirilib

Tovuz rayonunun Əsrik dərəsi ərazisində “Mübariz bulağı” komleksi tikilib, bulaq yaxınlığındakı adsız zirvəyə isə “Mübariz zirvəsi” adı verilib, bu yeni adlandırılmanı bildirən lövhə vurulub. Millət vəkili Qənirə Paşayevanın təşəbbüsü və Tovuz rayon rəhbərliyinin dəstəyi ilə baş tutan bu xeyirxah iş 26 iyun –Azərbaycan Silahlı Qüvvələri yaranmasının 94-cü ildönümü münasibəti ilə, qəhrəmanın atası Ağakərim İbrahimovun iştirakı ilə ictimaiyyətə təqdim olunub. Təqdimat-ziyarətdə millət vəkili Qənirə Paşayeva çıxış edərək, bugünü bütün iştirakçıların həyatında əlamətdar hadisə adlandırıb, bu məkanın ən çox ziyarət ediləcək ərazilərdən olacağına, yeni evlənən gənclərin, əsgər gedən oğlanların gəlib buranı ziyarət edəcəyinə inandığını qeyd edib. Tovuz rayon İcra Hakimiyyətinin başçısı Tofiq Zeynalov bildirib ki, bulaq-kompeksin ərazisi yaxın günlərdə daha da böyüdüləcək və abadlaşdırılacaq. Ərazidə qəhrəman gizirin heykəli ucaldılacaq. O, qeyd edib ki, heykəlin maketi hazırdır və heykəl üzərində tamamlanma işləri aparılır. Qəhrəmanın atası Ağakərim İbrahimov bulaq-komleksin açılışından çox duyğulandığını bildirmiş, əməyi keçən hər kəsə öz təşəkkürlərini yetirib. Aşılışdan sonra ictimaiyyət nümayəndələri Milli Qəhrəmanın atası Ağakərim İbrahimovla bulaq önündə xatirə şəkilləri çəkdiriblər.