ABŞ-ın Kolorado ştatında kinoteatrda baş vermiş atışma nəticəsində yaralanan 11 nəfərin vəziyyəti ağır olaraq qalır.
Kütləvi qətlin baş verdiyi Avrora şəhərinin polis rəisi Den Oats hadisə nəticəsində 12 nəfərin öldürüldüyünü, 58 nəfərin yaralandığını bildirib.
Qətli törədən 24 yaşlı Ceyms Xolmsun istifadə etdiyi bütün silahları qanuni şəkildə əldə etdiyi məlum olub. “AR-15” yarımavtomat silah, tüfənf və 40 kalibrli iki “Qlok” tapançası və 6000 güllə götürən Xolms özünü Betmenin düşməni Coker adlandırıb və saçlarını qırmızı rəngə boyayıb. Gecə seansına bilet alan Xolms digər tamaşçılarla birlikdə zala daxil olub. Təxminən 30 dəqiqə sonra zala gözyaşardıcı qaz səpən “denverli atıcı” xaotik atəş açmağa başlayıb. Polis qatili kinoteatrın arxa qapısından çıxaraq maşına tərəf gedərkən yaxalayıb. Xolms saxlanan zaman müqavimət göstərməyib.