Türkiyədə Azərbaycan, Qazaxıstan, Özbəkistan və Fars körfəzinin ərəb dövlətlərinin vətəndaşlarına daşınmaz əmlak almağa imkan verən yeni qanuna görə, onlar daşınmaz əmlakı hər hansı ilkin şərt olmadan ala biləcəklər. Bu barədə Türkiyənin "Sabah" qəzeti xəbər verir.
Qanuna görə, Ermənistan, Suriya, Şimali Koreya, Kuba, Nigeriya və Yəmən kimi ölkələrin vətəndaşları Türkiyədə əmlak almaq hüququndan tamamilə məhrum ediliblər.
Habelə bəzi ölkələrin vətəndaşları bir sıra şərtlərə əməl etməklə əmlak ala bilərlər. Belə ki, Rusiya və Ukrayna vətəndaşları Qara dəniz sahillərində mülk ala bilməzlər. Yunanıstan vətəndaşları sahilyanı və sərhədyanı ərazilər istisna olmaqla, Türkiyənin bütün regionlarında əmlak ala bilərlər.
Bir müddət əvvəl Türkiyənin iqtisadiyyat nazirinin müşaviri Alparslan Uymazın verdiyi məlumata görə, yeni qanuna uyğun olaraq, əcnəbi alıcı Türkiyədə 60 hektaradək torpaq ala bilər.
Bundan başqa, əcnəbi vətəndaşlar ölkənin Baş qərargahının razılığı ilə hərbi obyektlərə məxsus və ya belə obyektlərin yaxınlığında yerləşən sahədə alqı-satqı apara bilər.
Onun sözlərinə görə, qanun layihəsi ölkənin hər bir vilayətində hər alıcıya ümumi topraq sahəsinin 10 faizindən azının əcnəbilərə satıla biləcəyini nəzərdə tutur.
Əvvəllər Türkiyədə yalnız ölkə vətəndaşlarının torpaq sahəsi ala bildikləri ölkələrin vətəndaşları topraq sahəsi ala bilərdilər.