Son illər Azərbaycanın işğal olunmuş ərazilərində meşələrin 5 faizinə qədəri ermənilər tərəfindən qırılıb.
Bu barədə "Azərbaycanın Ermənistanın işğalı altında olan ərazilərində qeyri-qanuni fəaliyyətlər: Peykdən çəkilmiş şəkillərlə sübutlar" adlı hesabatın təqdimatında “Azərkosmos” ASC-nin sədri Rəşad İbadov bildirib.
“Peyklərimiz vasitəsilə gördüyümüz işlərə görə, ermənilərin işğal etdikləri Azərbaycan ərazilərini vəhşicəsinə istismar edib dağıtdıqlarını əminliklə deyə bilərik. Yalnız son bir neçə ildə işğal olunmuş ərazilərdəki meşələrin 5 faizə qədəri məhv edilib”, - deyən “Azərkosmos” rəhbəri çəkilən şəkillərdə Laçın və bəzi başqa rayonlarda tikilən yeni qəsəbələr, bütün işğal olunan ərazi böyu dağıntı və viranələrin çox aydın göründüyünü diqqətə çatdırıb.