Qazaxıstan Azərbaycanla əməkdaşlığın genişləndirilməsində maraqlıdır. Bu barədə çərşənbə günü jurnalistlərə Qazaxıstanın Azərbaycandakı səfiri Serik Primbetov bildirib.
"Qazaxıstan Azərbaycanla ticari-iqtisadi və investisiya sahəsində əməkdaşlığın genişləndirilməsində və ölkələrimiz arasında əmtəə dövriyyəsinin artırılmasında maraqlıdır", - səfir deyib.
Primbetov həmçinin qeyd edib ki, Qazaxıstan və Azərbaycanın regional və beynəlxalq xarakterli aktual məsələlərin əksəriyyətində yaxın mövqeləri və maraqları var.
Avqustun 27-də Azərbaycan və Qazaxıstan diplomatik münasibətlərin qurulmasının 20 illiyini qeyd ediblər.
"Bu illər ərzində birgə səylərimiz sayəsində iki ölkənin qarşılıqlı iqtisadi və siyasi fəaliyyətinin bütün istiqamətləri üzrə nəzərəçarpacaq dərəcədə irəliləyiş olub", - Primbetov vurğulayıb.
Mətbuat konfransı zamanı Serik Primbetov Azərbaycanda Qazaxıstan səfirliyi ilə əməkdaşlıq edən jurnalistlərə təşəkkür məktubları təqdim edib.