Oğurluğa cəhd edən şəxs polis əməkdaşlarının sayıqlığı və çevikliyi sayəsində cinayət başında yaxalanıb. Daxili İşlər Nazirliyinin (DİN) mətbuat xidmətindən bildiriblər ki, dekabrın 17-də saat 5 radələrində Nəsimi rayonunun S.Rüstəm küçəsindəki mağazaların birindən qapını sındırmaq yolu ilə oğurluğa cəhd göstərən şəxs həmin ərazidə xidmət aparan nazirliyin Baş İctimai Təhlükəsizlik İdarəsinə bilavasitə tabe olan Diplomatik Nümayəndəliklərin Mühafizəsi üzrə Əlahiddə Polis Taborunun əməkdaşları tərəfindən saxlanılaraq 21-ci polis bölməsinə təhvil verilib.
Araşdırmalarla onun paytaxt sakini, əvvəllər məhkum olunmuş S.Zeynalov olması müəyyən edilib. Ətrafında aparılmış əməliyyat tədbirləri ilə onun dekabrın 7-də daha bir mağazadan 558 manat və tütün məmulatı oğurlaması da müəyyən edilib. Faktla bağlı araşdırma aparılır.

DAVAM.AZ