Yil boshidan buyon Toshkent shahar madaniyat bosh boshqarmasi tasarrufidagi madaniyat muassasalarining hisobot konsertlari oʻtkazildi. Madaniy-maʼrifiy maskanlar qoshidagi badiiy jamoalar faoliyatiga teran tahliliy nazar tashlashga yaqindan yordam beruvchi ushbu konsert dasturi Oʻzbek Milliy akademik drama teatrida ham boʻlib oʻtdi. Unda Toshkent shahar markaziy madaniyat markazining badiiy jamoalari oʻz repertuaridagi eng sara dasturlarni tomoshabinlar eʼtiboriga havola etdi. Yurtimizda milliy madaniyatni yana-da rivojlantirish, aholiga madaniy xizmat koʻrsatish sifatini yaxshilash, hamyurtlarimizning madaniy ehtiyojlarini qondirish va boʻsh vaqtlari mazmunli oʻtishini taʼminlash, ijodiy jamoalarning milliy qadriyat, urf-odat va anʼanalarini oʻzida mujassam etgan namunali dasturlarini shakllantirish madaniyat markazlari faoliyatida ustuvor oʻrin tutadi. Shu bilan birga xalq ijodiyoti va badiiy havaskorlik sanʼatini saqlab qolish va rivojlantirish, turli toʻgaraklar, studiyalar, kurslar, qiziquvchilar klublari, badiiy havaskorlik jamoalarini tashkil etish va ularning faoliyat yuritishi uchun qulay sharoitlar yaratishda ushbu markazlarning ahamiyati katta boʻlmoqda.
Har yili madaniyat markazlarining shu kabi konsertlarini oʻtkazish yaxshi anʼanaga aylangan, – dedi Toshkent shahar markaziy madaniyat markazi rahbari Zohida Umarova. – Bunday konsertlar badiiy jamoalarning faoliyatiga atroflicha baho berish, yutuqlari nimalardan iborat, qayerda kamchiliklari bor ekanini toʻlaqonli aniqlab olish imkonini yaratgani bilan ham ahamiyatlidir.
Toshkent shahar markaziy madaniyat markazi tasarrufida 8 ta badiiy jamoa hamda bir qator badiiy ijodiyotga doir toʻgaraklar faoliyat koʻrsatadi. Mazkur jamoa va toʻgaraklar xalqimiz, ayniqsa, yoshlarning boʻsh vaqtini toʻgʻri va mazmunli tashkil etishda, turli madaniy-maʼrifiy tadbirlarni koʻtarinki va bayramona ruhda oʻtkazishda oʻziga xos hissa qoʻshmoqda. Hisobot konsertida badiiy jamoalar va ijrochi yoshlar ishtirokida jonajon Oʻzbekistonimizni, mustaqilligimizni, yoshlarga koʻrsatilayotgan mehr va eʼtiborni tarannum etuvchi kuy-qoʻshiqlar, goʻzal raqslar ijro etildi.

DAVAM.AZ
“Daşkənd Bürosu” (Özbəkistan)