Gagauziyanın Kongaz küüyünün Todur Zanet teoretik liţeyindä oldu prezentațiya “Gagauziya (Gagauz Yeri) avtonomiyasına yol (patretlerdä)” dokumental kiyadına hem o kiyada görä yapılan patret sergisinä, angıları maasuz hazırlandılar Gagauziya (Gagauz Yeri) avtonomiyasının 25-ci yıldönümünä. Başta lițeyin direktoru Mariya Çebanova olarak, prezentațiyayı hazırladılar hem ona katıldılar lițeyin zavuçları, tehpersonal, üüredicilär gagauz dilindä hem gagauz literaturasında, gagazların istoriyasında, adetlerindä hem sıralarında hem başlangıç klaslarda: Evgeniya Arnaut, Matröna Bargan, Anastasiya Çebanova, Marina Çebanova, Zinaida Buzacı, Mariya Duşkova, Elena Duşkova, Praskovya Doykova, Agafya Gaydarcı, Zinaida Neykovçena, Sofya Pulukçu, Stefanida Radova, Mariya Ratkova, Ekaterina Sıpçu, İvanna Uzun, Mariya Uzun, Sofya Zahariya.
Üüredicilerdän kaarä prezentațiyada pay aldılar liţeyin 5-12 klaslarınadan üürencilär, Kongazın Nikolay Çebanov hem Varvara Topal gimnziyalarından üüredicilär hem üürencilär.
Prezentațiyanın başında “Gagauziya (Gagauz Yeri) avtonomiyasına yol (patretlerdä)” dokumental kiyadın avtoru akademik Todur ZANET annattı kiyadın hem serginin hazırlanması için, söleyip, ani kiyat yapıldı Türkiye Yurtdışı Türklär hem Soy Topluluklar Başkannıın (YTB) teklifinnän hem çalışmasınnan, Moldovada Türkiye Büükelçiliin yardımınnan hem Gagauziyanın “GAGAUZLUK” Cümne Birliin zaametinnän. Sora Canabisi annattı kiyada girän materiallar için hem sergi plakatlarında gösterilän olaylar için nasaat etti. Sora da koyulan soruşlara cuvap verdi. Bu büük hem gözäl sırada oldu kısa bir prezentațiya avtorun 2018-ci yılda çıkan “Todur ZANET. Seçmä yaratmalar. 60 yaşına” kiyadına da. Bu kiyattan iki peeti candan okudular büük klaslardan üürenciykalar Dorina Duşkova hem Polina Rusu. İkibuçuk saatlık buluşma başarıldı onunnan, ani kiyadın avtoru baaşladı “Gagauziya (Gagauz Yeri) avtonomiyasına yol (patretlerdä)” dokumental kiyadı hem “Todur Zanet. Seçmä yaratmalar. 60 yaşına” kiatlarını herbir üürediciyä hem lițeyin biblioteksına.

Not. “Gagauziya (Gagauz Yeri) avtonomiyasına yol (patretlerdä)” 252 sayfalık kiyat hazırlandı 2 dildä: gagauzça hem angliyca. Angliycaya çevirdi genç hem talantlı yazıcı Tatyana DRAGNEVA. Kiyadın tirajı – 1000 taanä. Türkiye Yurtdışı Türklär hem Soy Topluluklar Başkannıın teklifinä görä bu kiyat verilecek diil salt Gagauziyanın, ama Türkiyenin hem Moldovanın bibliotekalarına, üüredicilik hem kultura kuruluşlarına, yaratmak evlerinä.

DAVAM.AZ
“Komrat Bürosu” (Qaqouz Yeri)