Ánshi fonogramma qoldanatyn bolsa, ony ózi týraly jarnama jasaǵan kezde mindetti túrde habarlaýy kerek. Bul týraly «Kontserttik-gastroldik qyzmet boıynsha memleketik kontserttik uıymdardyń respýblıkalyq ortalyǵynyń» tusaýkeserinde aıtyldy.
«Búgin QR Mádenıet jáne sport mınıstrliginiń bastamasymen mýzeı, kitaphana, teatr jáne kontserttik sala boıynsha tórt ortalyq ashylyp jatyr. Munyń bárin úılestiretin QR Mádenıet jáne sport mınıstrligi, onyń ishinde Mádenıet jáne óner isteri departamenti. Búgingi kúni kontserttik-gastroldik jumys bir júıege qoıylmaǵan. Sonyń saldarynan óńirlik deńgeı túgili, respýblıkalyq deńgeıdegi birneshe uıym bir aımaqqa bir mezgilde baryp, kontsert ótkizip jatady.
Bul - durys emes jaǵdaı. Osynyń bárin bir júıege qoıý úshin osy ortalyq qurylyp otyr», - deıdi Mádenıet jáne óner isteri departamentiniń dırektory Kúmis Seıitova. Ol bul ortalyq kontserttik júıede bar barlyq máselemen aınalysatyny týraly aıtty.
«Búgingi kúni biz Mádenıet týraly zańǵa ózgerister engizip jatyrmyz. Zańnamamyz keshe ótken májilistiń birinshi otyrysynda talqylandy. Zań jobasy boıynsha birneshe máseleni kóterip otyrmyz. Birinshiden, fonogrammany qoldanatyn oryndaýshy ózi týraly jarnama jasaǵan kezde, bılet satatyn kassada mindetti túrde ol týraly habarlaýy kerek. Ony habarlaý tártibin zań qabyldanǵan soń buıryqpen bekitemiz. Ekinshiden, kontsert ótkizgen kezde oryndaýshynyń minez-qulqy durys bolýy kerek. Bul týraly kontsert uıymdastyratyn adam nemese uıym óziniń kelisimshartynda jazyp qoıýy kerek. Úshinshiden, balaǵat sózderi bar repertýarlarǵa jol berilmeý kerek. Osy úsh talapty talqylap, sizderdiń usynystaryńyz boıynsha protokol jazyp, osy máseleni taǵy kóteremiz», - deıdi ol.

DAVAM.AZ
“Nur-Sultan Bürosu” (Qazaxstan)