PKK terror təşkilatı İran qazını Türkiyəyə nəql edən kəmərdə baş vermiş partlayışa görə məsuliyyəti öz üzərinə götürüb.



Bu barədə bəyanat yayan qruplaşmanın "Xalq Müdafiə Qüvvələri" adlandırılan hərbi qolu partlayışın Səma Köçər adlı qadın üzvü tərəfindən həyata keçirildiyini bildirib.



Qruplaşma bildirib ki, həmin qadın ərazidə növbə çəkən türk əsgərlərə hücum edib və daha sonra özünü partladıb. Terror təşkilatı həyata keçirilən bu kamikadze hücumu nəticəsində bir neçə türk əsgərin öldüyü və yaralandığını iddia edib.



Xatırladaq ki, bir neçə gün öncə sözügedən qaz kəmərinin Türkiyənin İranla həmsərhəd bölgəsindən keçən hissəsində güclü partlayış baş vermişdi. Kəmər bundan öncə də dəfələrlə PKK terror təşkilatı tərəfindən partladılıb.



Türkiyə mediasının yaydığı məlumatda partlayış nəticəsində ölən və yaralananın olmadığı bildirilirdi.