İranın milli valyutası rial sürətlə ucuzlaşmağa davam edir.

Həyata keçirdiyi nüvə proqramları ilə bağlı olaraq tətbiq olunan embarqoların çox ağır vəziyyətə saldığı İranda hakimiyyət dairələri ABŞ (Amerika Birləşmiş Ştatları) dolları ilə avronun dövriyyəsini azaltmaq məqsədilə zorakı tədbirlərə əl atmağa başlayıblar.

Vətəndaşların valyuta ticarətinin qarşısını almaq üçün ölkə hakimiyyəti paytaxt Tehranda yalnız İran Milli Bankının lisenziyası ilə fəaliyyət göstərən bir neçə valyuta mübadiləsi məntəqəsini açıq saxlayıb.

Bu məntəqələrdə ABŞ dolları "qara bazar"dakı nırxdan 25 faiz ucuz, 28 min riala satılır. Lakin, məlumata görə, sözü gedən valyuta məntəqələrində yetəri qədər dollar yoxdur.

Tehranda 30 valyuta alverçisi "bazarda pozğunluq yaratmaq cəhdi"ndə suçlanaraq tutulub, onlardakı valyutalar müsadirə olunub.