Telekanal bildirib ki, yanğının baş verməsi ilə bağlı xəbərlərin yayılmasından bir neçə saat öncə farsdilli şöbənin əməkdaşlarına "Vətən Hepardları" adlı tanınmamış qruplaşmadan email daxil olub.


Email məktubunda "Vətən Hepardları" Nətənz təsisatında baş verən hadisə ilə bağlı məsuliyyəti öz üzərinə götürdüyünü elan edib.


Qruplaşma həmçinin bildirib ki, İranın xüsusi xidmət orqanları içərisində özünə bağlı fəaliyyət göstərən qüvvələri var.


Qeyd etmək lazımdır ki, bu gün səhər saatlarında sözügedən təsisatda yanğın baş verməsi ilə bağlı İranın Atom Enerjisi Təşkilatının sözçüsü Bəhruz Kamalvəndi məlumat yaymışdı. O, hadisənin çöldə, açıq hava altında yerləşən çardaq tipli anbarda baş verdiyini, təsisatın fəaliyyətinə heç bir təsir göstərmədiyini iddia etmişdi.


Lakin Kaliforniyada yerləşən "Middlebury" tədqiqat mərkəzinin İranın raket proqramı üzrə araşdırmaçısı Fabian Hinz məsələ ilə əlaqədar "Twitter"də yazdığı statusda qeyd edib ki, İranın Atom Enerjisi Təşkilatının yaydığı ilk görüntü yanğının təsisatın sentrifüqaların montajı bölməsində baş verdiyini göstərir.