“Son illərdə Abbas Lisani Azərbaycan millətinin milli hüquqlarını sadəcə mədəni və sivil yollarla müdafiə edib. Bu məsələ ilə bağlı həbs edilib və uzun müddət aclıq aksiyası keçirib, “ deyə Nayıb Haşim bildirib.





O əlavə edib ki, Abbas Lisani bütün təzyiqlərə baxmayaraq tələblərindən geri addım atmayıb və məqsədlərinə nail olmaq üçün yalnız dinc yollara əl atacağını bildirib.





Nayıb Haşım həmçinin Abbas Lisaninin cəzasının ləğvi və ən qısa müddətdə azadlığa buraxılması üçün bütün mədəni fəalları səfərbər olmağa çağırıb.





Qeyd edək ki, İran Ali Məhkəməsi Ərdəbil Apelyasiya Məhkəməsinin Abbas Lisaniyə qarşı çıxardığı qərarı təsdiq edərək qüvvədə saxlayıb.





Hazırda Ərdəbil zindanının 7-ci korpusunda saxlanılan Abbas Lisani 15 il həbs və 2 il sürgün cəzasına məhkum edilib. Birinci instansiya məhkəməsində 8 il azadlıqdan məhrum edilən fəalın həbs müddəti gözlənilməz şəkildə Ərdəbil Apelyasiya Məhkəməsinin 1-ci şöbəsi tərəfindən 15 ilədək uzadılıb.





Xatırladaq ki, son günlərdə İranda yaşayan qeyri-fars millətlərin təmsilçiləri və insan hüquqları təşkilatları Abbas Lisaniyə qarşı çıxarılan hökmə reaksiya göstərərək bu hökmün ləğv edilməsini istəyiblər.

Ərk- Azərbaycan İnsan Hüquqları Cəmiyyətinin sədri Jalə Təbrizi və Türkiyədə fəaliyyət göstərən “Çağdaş Azərbaycan Kültür Dərnəyinin” sədri Camal Məhmətxanoğlu, həmçinin İranda ərəb millətinin hüquqlarını müdafiə edən məşhur fəal və yazıçı Yusif Əzizi Bənitorof və Bəluc Fəallar Kampaniyası təşkilatının sədri Abdulla Arif, eləcə də Türkmənsəhra İnsan Haqları Kampaniyası fəalı Sadıq Rəcəbiyan Təmək və Türkmənsəhra İnsan Hüquqları Müdafiəçiləri Təşkilatının Koordinasiya Şurasının katibi Yusif Kor daha öncə tanınmış fəal barəsində çıxarılan həbs cəzasının təsdiqlənməsini qınayaraq onun qeydsiz-şərtsiz sərbəst buraxılmasını tələb ediblər.