Ermənistanın Tovuz rayonunda həyata keçirdiyi son təxribatçı hücumlardan sonra Güney Azərbaycanın milli fəalları müxtəlif şəhərlərdə Azərbaycana dəstək aksiyasının keçirilməsi üçün çağırış ediblər.





Milli fəallar tərəfindən yayılan bəyanatda iyulun 16-da Təbriz və Tehran şəhərlərində Azərbaycana dəstək mitinqlərinin keçiriləcəyi bildirilib.





Mitinq yerli vaxtla saat 18:00-da Təbrizdə Azərbaycan Respublikasının konsulluğu qarşısında, Tehranda isə işğalçı rejimin səfirliyi önündə həyata keçiriləcək.





Bununla bərabər, Urmiya, Zəncan, Sulduz və Ərdəbil şəhərlərində də dəstək aksiyalarının keçirilməsi nəzərdə tutulub.





GünazTV-yə daxil olan məlumata əsasən, İran Təhlükəsizlik Nazirliyi və “Sepah”ın əməkdaşları Təbriz, Zəncan və Urmiyada tanınmış azərbaycanlı yazıçılar və şairlər, eləcə də tanınmış fəallarla əlaqə saxlayaraq onlardan öz sosial şəbəkə səhifələrində aksiya əleyhinə çıxış etmələrini tələb ediblər.





Təhdidlərə baxmayaraq, azərbaycanlı fəallar sosial media səhifələrində bütün gücləri ilə mitinqdə iştirak edərək Şimali Azərbaycandakı soydaşlarına dəstək verəcəklərini açıqlayıblar.