İndoneziya parlamentinin fraksiyası Ermənistanın hərbi təxribatlarını pisləyən bəyanat yayıb.

İndoneziya parlamentinin xanım deputatı Anqqia Erma Rini həm öz adından, həm də parlamentdə təmsil etdiyi Milli Oyanış Partiyası fraksiyası adından Ermənistan-Azərbaycan sərhədində son günlərdə baş verən təxribatla əlaqədar bəyanat verib.

Parlamentdə 60-a yaxın üzvü olan fraksiyanın nümayəndəsi Anqqia Erma Rini bəyanatında Ermənistan silahlı qüvvələrinin iyulun 12-dən başlayaraq Azərbaycan ordusunun Tovuz rayonu istiqamətindəki mövqelərinə etdiyi hücumlar, habelə hərbçilərlə yanaşı, dinc sakinin həlak olmasına görə kəskin şəkildə etirazını bildirib.

İndoneziya parlamentinin üzvü Ermənistanı BMT-nin Təhlükəsizlik Şurasının Ermənistan-Azərbaycan Dağlıq Qarabağ münaqişə ilə bağlı qəbul etdiyi müvafiq qətnamələrinə hörmətlə yanaşmağa çağıraraq, Ermənistanın bütün silahlı qüvvələrini Azərbaycanın işğal olunmuş ərazilərindən çıxarmasını tələb edib.