Milli fəalın iş yoldaşları onun yaxınları ilə əlaqə saxlayaraq Mənafi Nadarlının iyulun 21-də axşam saatlarında öz iş yerində tutulduğunu bildiriblər.





Onun hansı səbəbdən tutulduğu və harada saxlanıldığı barədə hələlik heç bir məlumat yoxdur. Lakin bu məsələnin 2014-cü ildə keçirilən Beynəlxalq Ana Dili Günü mərasimi ilə bağlı barəsində çıxarılan həbs və sürgün qərarı ilə əlaqədar olduğu ehtimal edilir.





Yanvarın 20-də Tehran Apelyasiya Məhkəməsinin 54-cü şöbəsi Əkbər Azad, Əlirza Fərşi, Behnam Şeyxi və Həmid Mənafi Nadarlını 2014-cü ildə Tehranın yaxınlığında yerləşən Nəsimşəhrdə Beynəlxalq Ana Dili Günü mərasiminə qatıldıqları üçün 2 il həbs və 2 il sürgün cəzasına məhkum etmişdi.





Azərbaycanlı fəalların apelyasiya məhkəməsi 2019-cu il dekabrın 23-də hakim Babayinin sədrliyi ilə keçirilmişdi.





Daha öncə Baharistan İnqilab Məhkəməsinin 1-ci şöbəsi Mənafi Nadarlını “ölkənin təhlükəsizliyini pozmaq məqsədi ilə cəmiyyət yaratmaq”da günahlandıraraq 10 il həbs və 2 il Loristan əyalətinin Azna şəhərinə sürgün cəzasına məhkum etmişdi.