Azərbaycan əyalətinin Vərziğan şəhərində baş vermiş zəlzələ nəticəsində 30 nəfər xəsarət alıb.

İran mətbuatının yaydığı ilkin məlumata əsasən, yaralılar Vərziğan şəhər xəstəxanasına çatdırılıb. Onların əksəriyyəti məktəblilərdir.

Zəlzələ bu gün səhər Vərziğan şəhərində yerli vaxtla saat 09:55-də qeydə alınıb. Yeraltı təkanlar Ərdəbildə 5 və Əhər-Vərziğan məntəqəsində 5.5 bal gücündə hiss olunub.

Xatırladaq ki, avqustun 11-də Şərqi Azərbaycan əyalətinin Vərziğan və Əhər şəhərlərində 6,2 bal gücündə baş vermiş zəlzələ nəticəsində rəsmi açıqlamalara görə 300 nəfərdən çox ölmüş, 2500-ə yaxın adam xəsarət almışdı. Əyalətdə 538 kənddən 110-u qismən və ya tamamilə dağılmış, təxminən beş min bina zərər görmüşdü. Ancaq qeyri rəsmi açıqlamalara görə zəlzələ nəticəsində ölüb vəya zərərçəkənlərin sayı rəsmi rəqəmlərdən qat-qat artıqdır.

Qeyd edək ki, Zəlzələ Azərbaycan Cümhuriyyətinin sərhəd yaşayış məntəqələrində-Lənkəran, Naxçıvan, Ordubadda 3 bala yaxın hiss olunub.