Ermənistan silahlı qüvvələri Azərbaycan əhalisinin sıx yaşadığı yaşayış məntəqələrini, mülki obyektləri, o cümlədən fərdi və çoxmənzilli yaşayış binalarını, təsərrüfatları ağır artilleriya qurğularından atəşə tutmağa davam edir. Ağdam rayonunun işğal altında olmayan kənd və qəsəbələrinin artilleriya atəşinə məruz qalması nəticəsində yaşayış evlərinə, yardımçı binalara, məktəblərə, mağaza və digər obyektlərə, elektrik və qaz təsərrüfatlarına ziyan dəyib, vətəndaşlara məxsus ev heyvanları tələf olub.

Məcburi köçkünlər üçün salınmış qəsəbələrinn birinə gedərək erməni hərbçilərinin vəhşiliklərini lentə alıb, sakinlərlə həmsöhbət olub. Güllücə kəndindən olan məcburi köçkün Məhəmməd Vəliyevin evi mərminin partlaması nəticəsində əşyaları ilə birlikdə yanıb. Məhəmməd Vəliyev o dəhşətli anları belə xatırlayır: "Həyətdə idik. Atılan yeddinci mərmi evimizə düşdü, yanğın baş verdi. Heç nə çıxara bilmədik. Bütün əşyalar yandı. Ancaq təəssüflənmirik, hər şey öz yerini alacaq. Bu evi dövlətimiz tikib vermişdi. Dağılan evlər yenidən tikiləcək, bərpa ediləcək. Təki əsgər və sabitlərimiz sağ olsun, təki torpaqlarımız işğaldan azad edilsin".

Aytəkin Novruzova: "Həyətdə oturmuşduq. Qəfildən mərminin biri evin arxasına - həyətə düşdü. Qəlpələr evimizə, meyvə ağaclarına zərər vurub. Təki salamatçılıq olsun, belə evlər əsgərlərimizə qurban. Əsgərlərimizin arxasında dayanmışıq. Heç yerə çıxmırıq. Gündəlik işimizlə məşğuluq. İnarırıq ki, bütün torpaqlarımız azad olacaq, bütün köçkünlər öz yurdlarına dönəcəklər".

Qeyd edək ki, sentyabrın 27-si səhər saatlarından Ermənistan silahlı qüvvələri genişmiqyaslı təxribat törədərək cəbhəboyu zonada yerləşən Azərbaycan Ordusunun mövqelərini və yaşayış məntəqələrimizi iriçaplı silahlar, minaatanlar və müxtəlif çaplı artilleriya qurğularından intensiv atəşə tutub. Dinc sakinlər hədəf alınıb, onların evlərinə, əmlaklarına və infrastruktura ciddi ziyan dəyib. Ermənistan silahlı qüvvələrinin döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan Ordusunun komandanlığı tərəfindən qoşunlarımızın bütün cəbhəboyu əks-hücum əməliyyatına başlaması barədə qərar verilib.

Ermənistan silahlı qüvvələri dinc əhalini məqsədli şəkildə hədəf alır, qadağan olunmuş mərmilərdən, o cümlədən fosforlu bombalardan istifadə edirlər.