3 dekabr – Beynəlxalq Əlilliyi olan Şəxslər Günüdür. Əlilliyi olan şəxslərin cəmiyyətə inteqrasiyası və məşğulluğunun təmin olunmasında onların sahibkarlıq fəaliyyətinə və özünüməşğulluq proqramlarına cəlb olunması xüsusilə əhəmiyyətlidir. Bu məqsədlə Kiçik və Orta Biznesin İnkişafı Agentliyi (KOBİA) tərəfindən əlilliyi olan şəxslər arasında sahibkarlıq fəaliyyəti təşviq edilir, onların biznesə başlamasına və sahibkarlıq fəaliyyətlərinin inkişafına müxtəlif dövlət dəstəyi mexanizmləri çərçivəsində dəstək göstərilir, biznesyönümlü təlim və məsləhət xidmətləri, əlaqələndirmə, məhsullarının tanıdılması və satışına dəstək olunur. Əlilliyi olan şəxslər öz bizneslərini qurmaq və mövcud sahibkarlıq fəaliyyətlərini genişləndirmək üçün KOBİA-nın Bakı, Sumqayıt, Xaçmaz və Yevlax şəhərlərində fəaliyyət göstərən KOB inkişaf mərkəzlərinin ödənişsiz təlim, məsləhət, şəbəkələşmə və digər xidmətlərindən istifadə edə bilərlər.

KOBİA-dan bildirilib ki, indiyədək 50-dək əlilliyi olan şəxs KOBİA-nın biznesə başlamaq və sahibkarlıq fəaliyyətini inkişaf etdirmək üçün təlim və məsləhət xidmətlərindən yararlanıb. Agentliyin “KOB Dostu” şəbəkəsi və KOB inkişaf mərkəzləri əlilliyi olan şəxslərin biznesə başlaması üçün zəruri mal və avadanlıqlarla təmin olunmaları məqsədilə onları özünüməşğulluq proqramları ilə əlaqələndirib, bu istiqamətdə müvafiq dəstək göstərib.

Agentlik əlilliyi olan şəxslərin məhsullarının tanıdılmasına və satışına da dəstək göstərir. İndiyədək KOBİA 70-dək əlilliyi olan şəxsin 10-dan çox sərgi, yarmarka və festivalda ödənişsiz iştirakını təmin etməklə onların məhsullarının tanıdılmasına və satışına, işgüzar əlaqələr qurmasına dəstək olub. 2019-cu ildə isə Beynəlxalq Əlilliyi olan Şəxslər Günü ərəfəsində KOBİA tərəfindən 20-dək əlilliyi olan şəxsin əl işlərindən ibarət satış sərgisi təşkil olunub.

Ümumilikdə KOBİA-nın təşkilatçılığı və dəstəyi ilə əlilliyi olan şəxslərin iştirakı ilə 20-dək təlim, sərgi, konfrans və sair tədbirlər təşkil edilib, 100-dən çox əlilliyi olan şəxs biznesə başlamaq və sahibkarlıq fəaliyyətinin genişləndirilməsi üçün agentliyin dəstək və xidmətlərindən faydalanıb. Eyni zamanda, KOBİA yanında İctimai Şurada təmsil olunan 15 təşkilatdan biri də “Əlil Sahibkarlar Təşkilatı” İctimai Birliyidir və indiyədək birgə əməkdaşlıq çərçivəsində bir sıra tədbirlər və layihələr həyata keçirilib.