Naxçıvan Muxtar Respublikası Ədliyyə Nazirliyi və Naxçıvan Dövlət Universitetinin birgə təsdiq etdiyi 2020-2021-ci tədris ilinə dair tədbirlər planına uyğun olaraq universitetin Beynəlxalq münasibətlər və hüquq fakültəsinin hüquqşünaslıq ixtisasının IV kurs tələbələri nazirlikdə və tabe qurumlarında təcrübə keçirlər.

Nazirlikdən bildirilib ki, tələbələrin nazirliyin Naxçıvan Şəhər Nikah Evində, Naxçıvan Şəhər Qeydiyyat Şöbəsində və Naxçıvan Şəhər 3 saylı Notariat Ofisində təcrübə kursu keçmələri təmin edilib.

Onlara nikah əməliyyatlarının aparılması zamanı tələb olunan sənədlər barədə məlumat verilib, bu sahədə kargüzarlığın aparılması qaydaları əyani göstərilib.

Tələbələrə qeydiyyat sahəsində aparılan vətəndaşlıq vəziyyəti aktlarının dövlət qeydiyyatına dair ərizə formaları, vətəndaşlıq vəziyyəti aktlarının dövlət qeydiyyatı, notariat hərəkətləri, notariat hərəkətləri aparılmasının əsas qaydaları, notariat hərəkətləri aparılan zaman dövlət rüsumunun ödənilməsi qaydaları və notariat hərəkətlərinə dair qanunvericiliyin əsas müddəaları haqqında məlumat verilib.

x x x

Naxçıvan Dövlət və “Naxçıvan” universitetlərinin IV kurs tələbələri “Badamlı” Mineral Sular Zavodundakı istehsal prosesi ilə yaxından tanış olublar.

İstehsalat təcrübəsində tələbələr müəssisənin fəaliyyəti, istehsal edilən məhsullar, onların çeşidi, tətbiq edilən müasir avadanlıqlar, məhsulların istehsal texnologiyasının keyfiyyətə təsiri barədə mütəxəssislər tərəfindən ətraflı məlumat alıblar. Bildirilib ki, “Badamlı” mineral suyu 1947-ci ildən istehsal olunur. Zavodda 14 çeşiddə istehsal olunan qazlı və qazsız “Badamlı” suları təkcə Naxçıvanda deyil, ölkəmizin hər yerində, eləcə də Rusiya, Qazaxıstan, Birləşmiş Ərəb Əmirliyi, Çin və İraq kimi ölkələrdə də özünə alıcı kütləsi toplayıb.

Sonda tələbələrin sualları cavablandırılıb.