Saatlıda milli adət-ənənələrimizin qorunub saxlanılması istiqamətində mədəniyyət evlərinin kollektivləri ilə mütəmadi görüşlər keçirilir. Növbəti belə görüş “Adıgün” türk xalq folklor kollektivi ilə olub.

Rayon Mədəniyyət İdarəsindən verilən məlumata görə, Sabirabad Regional Mədəniyyət İdarəsinin əməkdaşları və Saatlının mədəniyyət işçiləri Saatlı rayon Nəsimikənd kəndində fəaliyyət göstərən mədəniyyət müəssisələrinə baxış keçirib, Nəsimikənd “Adıgün” kənd mədəniyyət evinin və Nəsimikənd kənd folklor evinin iş şəraiti və fəaliyyəti ilə ətraflı tanış olublar.

Sonra “Adıgün” türk xalq folklor kollektivi müxtəlif rəqs nümunələri ilə çıxış ediblər.

Qeyd edək ki, “Adıgün” türk xalq folklor kollektivi 1970-ci ildən fəaliyyət göstərir. Kollektiv dəfələrlə Moskvada, Bakıda, Şimali Kiprdə və Türkiyədə çıxış edib, radio və televiziyada konsertlər verib, 1991-ci ildə Azərbaycan Respublikasının Mədəniyyət Nazirliyi tərəfindən Xalq Kollektivi adına layiq görülüb. Hazırda bu kollektivin 48 üzvü var. Üç yaş qrupunda fəaliyyət göstərən kollektiv uzun illərdir ki, Saatlı rayonunda keçirilən mədəni kütləvi tədbirlərdə mütəmadi iştirak edir