Qubadlı Rayon Mədəniyyət İşçiləri Həmkarlar Komitəsinin təşəbbüsü ilə Vətən müharibəsinin şəhidi Ramil Elşən oğlu Quliyevin ailəsi ziyarət edilib.

Ziyarət zamanı şəhidimizin keçdiyi qısa, ancaq şərəfli həyat yolu haqqında danışılıb. Bildirilib ki, Ramil Quliyev 1991-ci il yanvarın 4-də Qubadlı rayonunda anadan olub. 1997-ci ildə Sumqayıt şəhər 14 nömrəli tam orta məktəbin 1-ci sinfinə daxil olub və 2008-ci ildə şəhərin 35 nömrəli məktəbin məzunu olub. O, 2015-ci ildə Kiyevdə Personalın İdarəetməsinin Regionlararası Akademiyasının Menecment fakültəsinin məzunu olub.

Hərbi xidmətdə olduğu müddətdə Lələtəpə uğrunda gedən döyüşlərdə iştirak edib və 2016-cı ilin iyul ayında hərbi xidmətini başa vurub.

Görüşdə iştirak edən əsgər yoldaşları onun haqqında fikirlər səsləndirərkən qeyd ediblər ki, ötən il sentyabrın 29-da Ramil də bir çox oğullarımız kimi, torpaqlarımızın ərazi bütövlüyünün bərpası üçün müharibəyə yollanıb. Ramil müharibədə rəşadətlə vuruşub. Hadrut uğrunda gedən döyüşlərdə verilən tapşırığı yerinə yetirərkən düşmənin snayper gülləsinə tuş gələrək qəhrəmancasına şəhid olub.

Xəstə anası Ramilin şəhid xəbərini eşidəndən bir neçə gün sonra dünyasını dəyişib.

Şəhidin ailə üzvləri Ramil və onun kimi minlərlə digər Azərbaycan igidləri ilə fəxr edirlər.