Yeni tədris ilinin başlanması ilə əlaqədar Daxili İşlər Nazirliyinin Baş Dövlət Yol Polisi İdarəsinin (DYP) əməkdaşları ölkə ərazisində təhlükəsizlik tədbirlər həyata keçirirlər.

Daxili İşlər Nazirliyinin mətbuat xidmətinin Bərdə regional qrupundan bildirilib ki, məktəblərdə dərsin başlanması ilə əlaqədar baş verə biləcək yol qəzalarının qarşısının alınması və məktəblilərin təhlükəsizliyinin təmin olunması məqsədilə “Diqqət uşaqlar!” adı altında Ağcabədi, Ağdam və Bərdə rayonlarında tədbirlər təşkil olunub.

Yollarda hərəkətin təhlükəsizliyinin təmin olunması, o cümlədən məktəblilərin iştirakı ilə baş verə biləcək yol nəqliyyat hadisələrinin qarşısının alınması istiqamətdə görülən tədbirlər çərçivəsində DYP bölmələrinin və Baş Dövlət Yol Polisi İdarəsinin “Siqnal” idarəsinin əməkdaşları ilə birgə təhsil müəssisələrinin yerləşdiyi ərazilərdə yol şəraiti müayinə edilərək bir sıra işlər görülüb. Belə ki, piyada zolaqları yenidən rənglənib, yeni yol nişanları qoyulub və köhnələri yenisi ilə əvəzlənib. Həmçinin tədbirlər zamanı bir neçə təhsil ocağının qarşısında yeni zolaqlar salınıb. Bu istiqamətdə tədbirlər davam etdirilir.