Hər il olduğu kimi, 2012-ci ildə də həm qazandıqlarımız, həm də itirdiklərimiz oldu. İtirdiklərimiz arasında bu il vəfat etmiş bir sıra tanınmış şəxslər də var. Bu il itkilərimizi bir daha oxucuların yadına salır və mərhumlara Allahdan rəhmət diləyir.

Xronoloji ardıcıllıqla:

Azərbaycanın məşhur memarı, Şərq ölkələri Beynəlxalq Memarlıq Akademiyasının üzvü, “Şöhrət” ordenli, prezident təqaüdçüsü, əməkdar mühəndis və memar Yuzef Qədimov yanvarın 8-də vəfat edib.

Şair-dramaturq Miryusif Mirnəsiroğlu yanvarın 29-da vəfat edib. O, bir müddət Quba Dövlət Dram Teatrında, Gənc Tamaşaçılar Teatrında işləyib. Daha sonralar isə Hacıqabul rayonu Qarasu orta məktəbində müəllim, direktor, Şirvan Şəhər Mədəniyyət və İstirahət Parkının direktoru, Musiqi məktəbinin direktoru, Pedaqoji məktəbinin dil-ədəbiyyat müəllimi kimi çalışıb.

Xalq rəssamı Oqtay Şıxəliyev də 2012-ci ildə dünyasını dəyişdi.

Azərbaycanın dövlət xadimi, prezidentin fərdi təqaüdçüsü Lidiya Rəsulova itiridiyimiz tanınmış simalar sırasına daxildir. O, 1981-1988-ci illərdə Azərbaycan Respublikası Həmkarlar İttifaqları Şurasının sədri, 1988-1992-ci illərdə sosial təminat naziri olub, daha sonra Azərbaycan Respublikası Dövlət Elm və Texnika Komitəsi sədrinin müavini, 1993-cü ildən etibarən təhsil naziri işləyib. Səhhətində yaranmış problemlərlə əlaqədar 1997-ci ildə təhsil naziri vəzifəsindən azad olunan L.Rəsulova pedaqoji fəaliyyətini davam etdirərək ali təhsil müəssisələrində yüksək ixtisaslı kadrların yetişdirilməsi prosesində iştirak edib.

Azərbaycanın və Dağıstanın xalq artisti, bəstəkar Elza İbrahimova da bu il itirdiklərimizin siyahısındadır. Bəstəkar uzun sürən xəstəlikdən sonra 11 fevral 2012-ci ildə 74 yaşında vəfat edib.

Ədəbiyyatşünas, filologiya elmləri doktoru, Azərbaycan Yazıçılar Birliyinin üzvü, əməkdar müəllim Azad Nəbiyev fevralın 13-də dünyasını dəyişib.

Memarlıq və İnşaat Universitetinin keçmiş rektoru Qeybulla Qeybullayev martın 2-də dünyasını dəyişib. O, Türkiyənin baş naziri Rəcəb Tayyib Ərdoğanın Avrasiya məsələləri üzrə müşaviri işləyib.

AMEA Rəyasət Heyətinin üzvü və Nizami adına Ədəbiyyat İnstitutunun direktoru, akademik Bəkir Nəbiyev martın 15-də vəfat edib.

Tanınmış fotojurnalist Əjdər Nağıyev aprelin 2-də vəfat edib. Ə. Nağıyev uzun illər Azərbaycanın müxtəlif media quruluşlarında, o cümlədən “Azadlıq” qəzetində çalışıb.

Azərbaycan Milli Elmlər Akademiyasının həqiqi üzvü, akademik Midhət Abbasov da 2012-ci ildə vəfat edib. Apreldə dünyasını dəyişən mərhumun uzun müddət ağır xəstəlikdən əziyyət çəkdiyi bildirilir.

Azərbaycan kino və televiziya rejissoru, əməkdar incəsənət xadimi Tariyel Vəliyev aprelin 24-də dünyasını dəyişib. O, Azərbaycan Dövlət Televiziyası “Ədəbi-dram verilişləri” Baş Redaksiyasının baş rejissoru, Azərbaycan Dövlət Mədəniyyət və İncəsənət Universitetinin televiziya rejissoru kafedrasının müdiri işləyib.

Azərbaycan fotojurnalistikasında idman sahəsi üzrə 60 il çalışmış Faiq Rəcəbli 89 yaşında dünyasını dəyişib. Mərhum aprelin 25-də torpağa tapşırılıb.

Əməkdar mədəniyyət işçisi Nəcəf Həsənzadə aprelin 30-da vəfat edib. N. Həsənzadə filmlərdə və televiziya tamaşalarında əsasən kiçik rollarda çəkilib. Ömrünün 40 ilini Azərbaycan Dövlət Akademik Milli Dram Teatrında rejissor assistenti kimi işləyib.

Xalq artisti, aktyor Süleyman Nəcəfov da bu siyahıya düşüb. O, C.Cabbarlı adına İrəvan Dövlət Azərbaycan Dram Teatrında aktyor olub. Çingiz bəy (H.Cavid, "Maral"), Səlim, (C.Cabbarlı, "Aydın"), Süleyman, Rza bəy (Ü. Hacıbəyov, "Arşın mal alan", "O olmasın, bu olsun"), Dərviş (M.F.Axundov, "Müsyö Jordan və Məstəli şah"), Təlxək (U. Şekspir, "Axırı xeyir olsun") kimi müxtəlif janrlı obrazları ifa edib.

Azərbaycanın görkəmli pianoçusu, xalq artisti Zöhrab Adıgözəlzadə may ayının 24-də dünyasını dəyişib.

MSK-nin keçmiş sədri Cəfər Vəliyev iyunun elə ilk günündəə vəfat edib. O, Azərbaycanın "Şöhrət" və "İstiqlal" ordenləri, həmçinin SSRİ, Polşa, Çexoslovakiya, Monqolustan və Kubanın orden və medalları ilə təltif edilib.

Süleyman Rəhimovun oğlu, yazıçı-publisist Şamo Arif də bu il itirdiklərimizin arasındadır.

Tanınmış vəkil İsaxan Aşurov iyunun 22-də müalicə üçün getdiyi ABŞ-da vəfat edib. O, xərçəng xəstəliyindən əziyyət çəkib.

Rəssam Zahid Hüseynov 27 iyulda vəfat edib. Rəssam Rəssamlıq Akademiyasının kafedra müdiri işləyib.

İstedadlı gənc yazar, prezident təqaüdçüsü Zərdüşt Şəfizadə (Zərdüşt Şəfi) avqustun 3-də rəhmətə gedib

Milli Məclisinin keçmiş sədri Murtuz Ələsgərov avqust ayında itirdiklərimiz arasındadır. O, 7 avqustda vəfat edib.

Tanınmış hərbi eksperti, ehtiyatda olan polkovnik İldırım Məmmədov 16 avqustda dünyasını dəyişib. 1996-1998-ci illərdə hərbi hissə komandiri olub. 1999-2002-ci illərdə Ali Hərbi Məktəbdə baş müəllim vəzifəsində çalışıb. 2007-ci ildən bu günə qədər Hərbi Analitik Tədqiqatlar Mərkəzinin direktoru idi.

Milli təhlükəsizlik nazirinin keçmiş müavini, general-mayor Tofiq Babayev 8 sentyabrda vəfat edib. T.Babayev qaraciyər xəstəliyindən əziyyət çəkirmiş.

Teatr rejissoru, aktyor Rafiq Atakişiyev sentyabr ayının 27-də ürək çatışmazlığından vəfat edib. R. Atakişiyev 2005-ci ildə "Azərbaycan mədəniyyətinin və incəsənətinin inkişafında göstərdiyi xidmətlərə görə" fəxri nişanı ilə təltif olunmuşdu. "Qızıl Dərviş" mükafatının laureatıdır. "Oqtay Eloğlu", "Mahnı dağlarda qaldı", Bukovçanın "Qana qan" və "Afət" və s. son illərdə R.Atakişiyevin hazırladığı quruluşlardır.

Noyabrın 1-də akademik Budaq Budaqov dünyasını dəyişib. B.Budaqov AMEA Coğrafiya İnstitutunun direktoru işləyib.

Xalq artisti, məşhur aktyor Yaşar Nuri 22 noyabrda vəfat edib. O, qaraciyər xəstəliyindən əziyyət çəkirdi.

Məşhur diktor Sabir Axundov da bu il dünyasını dəyişdi. O, Azərbaycan Radio və Televiziyasının veteran diktoru olub və 88 yaşında dünyasını dəyişib.

Müğənni Vidadi Bərdəli noyabrın 30-da 53 yaşında vəfat edib. Paytaxt xəstəxanalarının birində müalicə alan müğənninin vəfatına səbəb beyninə qan sızması olub.

Ali Məhkəmənin sabiq sədri Ramazan Burcayev dekabrın 10-da dünyasını dəyişib. Burcayev uzun sürən xəstəlikdən sonra 72 yaşında vəfat edib.

Azərbaycan televiziyasının ilk qurucularından olan Sərvər Quliyev dekabrın 21-də vəfat edib.

Sevinc İltifatqızı/Modern.az/