Qadın voleybolçular arasında Azərbaycan Super Liqasında ikinci dövrənin növbəti oyunları keçirilib

Əvvəlcə meydana “Abşeron” və “Azərreyl” komandaları çıxıblar.Çempionatın turnir cədvəlinin lideri "Abşeron" rəqibinə 3:1 (25:14, 25:17, 22:25, 25:21) hesabı ilə qalib gəlib. Bu qarşılaşmadan sonra “Murov” - UNEC duelinə start verilib. "Murov" rəqibini 3:0 (25:22, 25:16, 25:17) hesabı ilə üstələyib.

Turnir cədvəlinə 15 xalla "Abşeron" klubu başçılıq edir. Yeddi xalı olan "Azərreyl" ikinci, 6 xalı olan "Murov" üçüncüdür. UNEC isə 2 xalla sonuncudur.

Fevralın 11-də isə ikinci dövrənin son oyunları keçiriləcək. Altıncı turun ilk qarşılaşması saat 16:00-da “Abşeron” – “Murov” komandaları arasında olacaq. Dövrəyə “Azərreyl” – UNEC görüşü ilə yekun vurulacaq. Oyunun start fiti saat 18:00-da veriləcək.

Qeyd edək ki, pandemiya səbəbindən karantin qaydalarına uyğun keçirilən oyunlara azarkeşlər buraxılmayacaq.